Mga lalaking sakop sa ‘drug’ gidudahang mga guns for hire
CEBU, Philippines - Dako ang pagtuo ni Provincial Police director, Sr. Supt. Patrocinio Comendador nga gun-for-hire ang mga lalaking ilang nasikop atol sa usa ka buybust sa Sitio Molave sa barangay Tayud sa lungsod sa Lilo-an.
Patay ang usa ka Richard Taco, bata-bata sa target unta nilang drug personality nga ginganlan lang og Bebot Pepito. Si Pepito ug ang iyang asawa daling naka-eskapo.
Nakuha sa kapolisan ang nagkalain-laing mga armas, granada, mga bala, magazine ug gibanabanang 2 mil ka paketeng shabu, gamit sa pag-repack niini ug drug paraphernalia.
Matud ni Comendador, ang napatay nga si Taco posibleng usa usab ka gun for hire.
Pito ka tawo ang gisikop sa Provincial Intelligence Branch , upat niini mga menor de edad ug ilaha na kini karong gi-turnover ngadto sa Women’s Desk.
Samtang ang tulo ka hamtong, usa kanila ang katabang ug ang usa mekaniko ug giingong walay dakong partisipasyon sa mga ilegal nga kalihokan sa ilang agalon nga si Pepito.
Gibana-banang mokabat sa kapin kun kulang usa ka milyon ang ilang narekober nga gituohang shabu. Nakuha nga mga armas mao ang Ingram, KG9 sub-machine gun, .45 pistols, .357 revolvers, 22 magnum, ug 9mm revolver. (/EIM) (BANAT NEWS)
- Latest
