CEBU, Philippines - Wala kaipsot sa gipahigayong saturation drive sa kapolisan ang duha ka mga drayber sa taxi ug traysikol kinsa giingong nag-pot session kagahapon sa buntag diha sa sitio Tunga, barangay Tanke, dakbayan sa Talisay.
Ang mga suspetsado mao sila si Jerome Mabala, 33-anyos, taga barangay Cansojong, dakbayan sa Talisay drayber sa taxi ug Leonilo Reyes, 43, taga barangay San Roque sa nahisgutang siyudad.
Ang nakasikop sa duha mao sila si SPO1 Rolando Bastida, PO3 Benedicto Lasque, PO2 Roy Lofranco ug PO1 Edwin Campomanes.
Si Lofranco nga nahinabi sa Banat News kagahapon mibutyag nga nagpahigayon sila og saturation drive sa lugar batok sa mga ilegal nga kalihukan.
Usa sa mga residente ang mitudlo sa mga polis kabahin sa lugar diin adto magluklok ang mga adik ug maghingos og shabu.
Matud ni Lofranco nga nalilian nila ang duha ka mga suspetsado diha sa usa ka silong sa balay nga nagsuyop hinungdan nga giaresto nila kini.
Ang mga suspetsado giingong misuway kini sa pagdagan apan wala na makaipsot tungod kay na-trap na sa mga polis.
Na-recover sa mga polis gikan sa posisyon sa mga suspetsado ang mga drug paraphernalia.
Si Lofranco midugang nga ang nahisgutang balay wala kini tawo gawas sa mga suspetsadong nagsuyop ug walay bisan usa sa mga residente diha sa duol ang mitug-an kung kinsay tag-iya sa maong balay.
Si Mabala ug Reyes mag-atubang og kasong paggamit og ginadiling drugas. (BANAT NEWS)