Barko natikyaob
CEBU, Philippines - Usa ka cargo vessel ang natikyaob samtang nagplastada sa ilang mga kargamentong mga truck vans nga puno sa asukar ug mga bugas diha sa Cabahug Wharf sa dakbayan sa Mandaue.
Ang MV Angelica Grace kalit lang miligid sa pikas kilid ug nalahos og kulob sa dagat pasado alas- 9 sa miaging gabii, duna kini kargang lima ka 8-wheeler truck vans nga adunay kargang sinakong asukar ug bugas.
Gikatakda unta kining molarga padung sa Masbate nianang gabhiuna kun wala pa kini matikyaob. Ang maong barko gipanag-iya sa Rapal Shipping Lines.
Ang kapitan sa maong barko nga si Wilson Dieta mibutyag nga nagkarga sila niadtong higayona sa mga truck dihang kalit nga mitakilid og maayo ang barko.
Gisuwayan unta nila kini pagbawi apan naatlan nga dunay nahiaging usa ka fastcraft sa Mactan Channel nga mimugna og mga bawod padung sa nagtakilid nilang barko hinungdan sa pagkatikyaob niini.
“Binawi namin, pero mabigat yung isang truck kaya tumagilid kami sa kabilang side tapos dumaan yung fast craft. Nag-alon na at tumagilid na kami tapos naputol ang lubid parang hirap nang bumawi,†padayag pa ni Dieta sa report sa Aksyon Bisaya News 5.
Ang pamahayag ni Dieta gidasunan usab sa usa sa mga tripulante nga si Gabriel Padillo. Matud pa niya, duna unta siyay kuhaong papeles sa sud dihang iyang nabantayan ang naghinobra na kaayong pagtakilid sa barko.
Tungod niini dali siyang midagan ug miambak sa dagat.
“Pag-agi sa fastcraft tuloy-tuloy na imbes na hila-on sa ‘tong sakyanan para makagawas para makabalanse di naman matabang,†matud pa ni Padillo.
Wala hinuoy nasakitan o nakalas sa 18 ka tripulante sa maong barko tungod kay naatol nga pulos sila nagbantay sa loading operation atol sa hitabo.
Si Coast Guard Station Commander Weniel Azcuna mipadala na og “oil spill booms†aron pugngan ang pagkatap sa bunker oil gikan sa maong barko.
Mopahigayon na og imbestigasyon ang Coast Guard ug Maritime Authority Industry sa maong aksidente. Gipaabot pang marine protest nga isang-at sa kapitan diha sa ilang buhatan. (BANAT NEWS)
- Latest
