CEBU, Philippines - Kritikal ang kahimtang sa usa ka mag-uuma human kini pusila sa iyang silingan nga iyang gikalalis didto sa bukirang bahin sa Sitio Sto. Niño Village, barangay Mantalongon lungsod sa Dalaguete niadtong Lunes sa alas 8:00 sa gabii.
Ang biktima mao si Jose Belcina Geolin, 58, minyo, ug molupyo sa maong lugar.
Samtang ang suspek mao usab si Rosendo Beldan alyas Sendo, hingkod, usa ka truck -boy nga silingan sa biktima.
Si PO2 Renaldo Amarillento sa Dalaguete Police Station mibutyag sa Banat News nga ang biktima ug ang suspek mitambong og birthday party sa ilang silingan diin sila mag-inom ug dihang nangalasbag na mitumaw na ang lalis. Dihang miinit na ang lalis milanit ang suspek sa iyang pusil ug giluthang ang tiyan sa biktima.
Human masuta nga samdan ang biktima dali kaayong miikyas ang suspetsado ug wala na hiabti sa kapolisan nga miresponde sa maong alarma.
Ang biktima daling gihatud ngadto sa Julio Cardinal Rosales hospital sa lungsod apan gibalhin usab dayon sa tambalanan sa dakbayan ug padayon pang gipangita sa kapolisan ang suspek. (BANAT NEWS)