Piyado miunay’g pusil sa kaugalingon

CEBU, Philippines - Gituohang naghikog pinaagi sa pagpusil sa iyang kaugalingon   ang  usa ka  piyado  sa yuta  sa barangay Dapdap lungsod sa Compostela kansang  patay’ng lawas nadiskobrehan  sa  mga  tagtungod kagahapon sa alas 5:00 sa buntag.

Si  Luis Pasco, 60, ulitawo, nga  molupyo sa nahisgutang lugar  samdan  sa dughan  sumala  ni SPO2 Pedro Enriquez sa Compostela Police Station. Giingong  nagkuob  kini  sa balisbisan  sa iyang  payag nga nagligid  sa kaugalingong  dugo.

Sa pag-respondi  sa kapolisan kauban ang municipal health officer nga si Dr. Vincent Jay Echen, nasuta nga patay na kini  gumikan  sa iyang  samad  sa bala.

Unya  sa  tupad niini  napalgan  nila  ang kalibre .45 nga pistola  nga  may  upat ka buhing bala  ug  may  duha  ka kabhang   sa bala  niini  duol  sa  iyang  gikub-an.

Dugang nahipos nga inpormasyon   sa kapolisan gikan sa kabanay niini nga ang biktima kanunay  kunong   naguol  kay  nag-inusara  lang  sa iyang  pagpuyo  samtang  nag-antos  sa sakit  nga  tuberculosis  nga gituohang hinungdan sa iyang pagpakamatay. Ang mga kabanay kombinsido  usab nga  kaugalingong  armas  niini  ang  gigamit sa iyang  paghikog. (BANAT NEWS)