CEBU, Philippines - Gipanghimakak ni Bureau of Customs Commissioner Rufino Rozzano "Ruffy" Biazon nga ang smuggling sa nasud usa ka campaign fundraising sa Liberal Party (LP) alang sa nagsingabot nga piniliay ning tuiga.
Kini maoy reaksiyon sa pamahayag ni Lito David usa sa kandidato pagka- senador sa Kapatiran Party atol sa iyang pagbisita dinhi sa Sugbu sa milabay’ng semana.
Matud pa ni Biazon bisan dili eleksiyon daan nang gihingusgan ang kampanya batok sa smuggling.
Tungod sa gihingusgang kampanya kontra smugglers, matud pa ni Biazon namalhin na og laing mga dapit ang mga smugglers aron ipalusot ang ilang mga kontrabando.
Apan bisan pa niini, daghan gihapong mga smuggled nga bugas, asukar, ug uban pang agricultural products.
Sayo niini, sa usa ka forum, gihinganlan ni David ang mga ahensya sa gobiyerno nga matud pa niya nag-una sa kurapsyon aron makatigom og campaign funds sa kampanya sa LP.
Ang Bureau of Customs , National Food Authority, Land Transportation Office, Bureau of Internal Revenue ug Department of Foreign Affairs maoy gitumbok ni David nga nagkumboya pagtigum og campaign fund alang sa LP.
Usa sa gibasehan ni David mao ang pagkawagtang sa 2,000 ka container vans didto sa kaulohan diin hangtod karon wala pa masulbad sa BOC kung kinsa ang responsable niini.
Walay lider sa LP nga nakuhaan og pamahayag kabahin sa maong pasangil ni David. (BANAT NEWS)