CEBU, Philippines - Patay na nga nakit-an ang usa ka 23-anyos nga ulitawo nga may deperensiya sa pangisip human kini maghikog pinaagi sa pagbitay sa punoan sa kahoy didto sa barangay Binabag, lungsod sa Pinamungajan niadtong Sabado sa ala 1:00 pasado sa hapon.
Ang nagpakamatay mao si Sarona Dejito, 23, ulitawo ug molupyo sa maong lugar ug usa ka estambay nga adunay kakulian sa panghuna-huna.
Si PO1 Froilan Velasquez sa Pinamungahan Police Station mibutyag sa Banat News nga ang mga bata nga nanguha og kahoy igsusugnod sa maong dapit maoy nakadiskobri nga nagbitay kini sa sanga sa kahoy kansang liog maoy gihiktan sa tumoy sa pisi ug gigaid usab ang pikas tumoy niini sa sanga sa kahoy.
Ila dayon kining gi-repot sa kapolisan kinsa mikompirmar nga migahi na ang lawas patay sa maong ulitawo.
Ang mga kabanay mitug-an nga sayo sa buntag pa nilakaw kini ug hangtud sa pagka-udto wala na kini mopauli.
Ila kining gipangita apan wala usab nila hikit-i hangtud nga mao nalay ilang nasayran gikan sa mga bata nga misum-ok sa libon dili layo sa ilang balay nga naghikog ang maong ulitawo.
Ang mga kabanay wala na motugot nga ipa-autopsy ang patayng lawas niini sanglit kombinsido sila nga nagpakamatay kini sa iyang kaugalingon. (BANAT NEWS)