CEBU, Philippines - Namatay diha-diha ang usa ka security guard human madasmag ang motorsiklo nga gisakyan niini sa usa ka dump truck sa barangay Looc, dakbayan sa Mandaue sa miaging kaadlawon.
Ang nakalas mao si Egnacio Lamag Jr, 25, ulitawo nga taga Barangay Tipolo, dakbayan sa Mandaue kinsa maoy security guard nga nagbantay sa Casino sa dakbayan sa Lapulapu
Si SPO2 Eduardo Flores, imbistigador sa trafiic division sa Mandaue City Police Office mibutyag sa Banat News nga gikan pa sa iyang trabaho ang biktima ug paingon na kining mopauli sa ilang balay sa Mandaue sakay sa iyang Honda nga motorsiklo.
Apan pag-abot nini sa dulhogong bahin sa first Mactan –Mandaue bridge sa parte niini sa Looc, wala siya makabantay sa naghunong nga dump truck nga nagyabo og aspalto sa giayo nga taytayan ug midasmag siya niini
Matud pa ni SPO2 Flores nga napasok sa ilawom sa likod nga bahin sa dump truck ang biktima ug ang mga sakop na sa Emergency Rescue Unit Foundation mao nay naghulbot niini. Gikarga dayon kini og ambulansya paingon ngadto sa Mandaue City District Hospital diin kini ideklarar nga patay na. Matud pa ni SPO2 Flores nga nabuak ang helmet sa biktima gumikan sa kakusog sa pagkaparok niini sa mga puthaw ilawom sa dump truck hinungdan sa dakong kadaot nga nahiagoman sa iyang ulo nga maoy hinungdan sa hinanali niyang kamatayon. (WC) (BANAT NEWS)