Rama apil sa mabasol nga wa modaog ang Konseho

CEBU, Philippines - Si Kongresista Tomas Osmeña miingon nga si Mayor Michael Rama apil nga mabasul kun ngano nga ang Cebu City Council wala makadaug isip Outstanding Sanguniang Panglungsod sa tibuok nasud.   Ang Department of the Interior and Local Government (DILG) mihukom nga ang Zamboanga City Council maoy isipon nga Outstanding Sanguniang Panglungsod karong tuiga.

Ang pagpasidungog gihimo didto sa kaulohan kaniadtong miaging adlaw. Apan bisan og wala mapili nga Outstanding Sanguniang Panglungsod sa tibuok nasud ang Cebu City Council, nakadaug kini dinhi sa rehiyon. Gipilde sa Zamboanga ang Cebu City Council tungod kay ang dakbayan sa Sugbo walay Comprehensive Land Use Plan samtang duna niini ang Zamboanga.

Matud ni Tommy nga sa mohapit na tulo ka tuig nga pagka mayor  ni Rama wala kini makamugna og CLUP. Hinoon, giangkon usab ni Osmeña nga atol sa iyang termino wala usab siya makahimo og Comprehensive Land Use Plan.

Apan bisan pa niadto, ang Cebu City Council pinangulohan ni Rama mao gihapon ang nahukman nga Outstanding Sanguniang Panglungsod duha ka higayon.

Ang planning officer nga si Alipio Bacalso miingon nga apil usab siya nga mabasol kay sukad siya milingkod sa pwesto wala siya makahimo og Comprehensive Land Use Plan tungod sa kakuwang niya sa mga tawo. (BANAT NEWS)