Bodyguard sa mayor sa Leyte gi-ambush patay

CEBU, Philippines - Patay ang bodyguard sa mayor sa Hilongos, Leyte human kini gipusil diha sa barangay Pulpogan Uno sa lungsod sa Consolacion.        

 Ang biktima nailhan nga si Jonathan Durano, 42, molupyo sa barangay Magay sa maong lungsod ug giingong didto na kini mabugtui sa iyang gininhawa sa tambalanan.Matud pa sa asawa sa biktima nga si Veronica, walay kontra ang iyang bana gawas lang nga kini maoy close-in bodyguard sa mayor sa Hilongos Leyte nga si Mayor Joy Roble.

Sa pasiunang imbestigasyon sa kapolisan pauli na ang biktima dihang kini gipusil sa duha ka lalaking nagmotorsiklo.

Patay na kini pag-abot sa Vicente Sotto Memorial Medical Center. Wala pay nakuhang lead ang kapolisan sa motibo sa maong kaso. Tulo ka  kabhang sa kalibre .45 nga gituohang maoy gigamit sa mamumuno.   (BANAT NEWS)