3 brgy. Kapitan mitahan sa ilang armas

CEBU, Philippines - Tulo ka mga kapitan sa barangay ang sunod sunod nga mitugyan sa ilang mga armas nga expire na ang lisensiya ngadto  sa buhatan sa kapolisan  sa lungsod sa Dalaguete tungod sa kabalaka nga madakpan sila nunot ning pagpatuman sa Comelec gun ban alang  sa nagsingabot  nga  piniliay  karong  Mayo.      

Niadtong Martes sa buntag ang kapitan sa barangay Casay nga si kapitan Joseph Belamia maoy katapusang mibisita sa buhatan sa kapolisan aron pagtugyan sa 9mm pistol nga iyang service firearm sa barangay.      

Samtang sa miaging adlaw mitahan usab sa iyang kalibre .45 nga pistola ang kapitan sa barangay Lumbang nga si kapitan Benjamen Entoma ug ang labing unang kapitan nga mitahan sa iyang service firearm mao si kapitan Elmer Lecaros sa barangay Saksak, kansang  armas, kalibre .45 usab  nga  pistola.      

Si PO3 Allan Sanoy sa Dalaguete Police Station  mibutyag  sa Banat News nga ang maong mga kapitan  nakahukom  sa pagdeposito sa ilang service firearms sa barangay human sila  makadawat og  suwat gikan sa Firearms and Explosive Supervisory and Guard Services (FESAGS) bahin sa nabahas  na  nga rehistro sa ilang mga armas.      

Laing gikabalak-an sa mga kapitan nga basin madakpan sila  tungod sa kahigpit  karon  sa balaod  bahin  sa  Comelec gun ban       Ang kapolisan padayong nag-awhag niadtong mga tawo nga naghupot og armas ilabi  na sa  mga walay lisensiya sa pagtahan niini  aron dili madakpan ug mapasakaan og kaso. (BANAT NEWS)