CEBU, Philippines - Babaye nga gituohang libog og pangisip nakasulod sa opisina ni Mayor Michael Rama nga nagdala og .38 kalibre nga revolver nga wala hisakpi sa mga guwardiya kaniadtong Martes sa buntag.
Ang babaye miagi nga wala mamatikdi sa duha ka gwardya nga nagbantay sa entrance sa city hall dapit sa M. C. Briones ug dayon lahos sa opisina sa mayor nga wala gihapon mamatikdi sa nagbantay sa pultahan niini. Si SPO1 Arnyl Gumonit nga usa sa mga security escort sa mayor maoy nakasakmit sa snub-nosed revolver gikan sa babaye nga lumulopyo sa Sitio Englis, Barangay Guadalupe.
Gihangyo hinoon ni Rama ang mga reporter nga dili lang ibutyag ang ngalan sa babaye kay mituo siya nga kini wala sa maayong panghuna-huna ug wala kini magplano og dautan kaniya.
Matud ni Rama nga sa wala pa masakpi ang armas gikan sa babaye alas kwatro sa hapon kaniadtong Martes, mitunol kini kaniya og suwat nga didto na gani niya nabasa sa iyang sakyanan samtang nagpaingon ang mayor sa usa ka kalihukan nga iyang gitambongan.
Sa suwat sa maong babaye nagbutyag kini nga napalgan niya ang armas didto sa iyang sudlanan sa sinena ug wala siya masayud asa niya itugyan mao nga miadto siya sa opisina sa mayor.
Dihang migawas si Rama sa iyang opisina lapas sa udto kaniadtong Martes, gipangutana pa siya niini kun asa siya mopaingon ug nga mihangyo nga ipabasa gayud ang iyang suwat.
Matud ni SPO1 Gumonit nga samtang nagpaabot ang babaye sa pagbalik sa mayor, mitug-an pa kaniya ang babaye nga aduna siya’y armas nga gidala ug iyang giputos.
Diha na nga ang babaye miabli sa iyang putos ug gitugyan kang SPO1 Gumonit ang armas nga adunay tulo ka bala.
Si Rama mipahulip dayon sa duha ka gwardya nga nalutsan ra sa maong babaye.
Bisan si Ben Cafe nga maoy tag-iya sa Cafe Security Agency diin mahisakop ang maong mga gwardya miangkon nga adunay sayop ang iyang mga sakop.
Matud ni Rama angay’ng mag-inabtik pa gayud ang mga gwardya sa ilang pagbantay nga walay makasulod nga dautang elemento sa City Hall. (BANAT NEWS)