CEBU, Philippines - Misamot kamasulob-on ang magtiayon kay gawas namatyan na sila mokabat sobra sa P100,000 nga kantidad pa sa kabtangan ug kwarta ang gikawat gikan kanila sa miaging adlaw sa Barangay San Isidro lungsod sa San Fernando.
Si Divina Maria Sasam, daling gialerto sa iyang mga silingan dihang migawas gikan sa ikaduhang andana sa ilang panimalay ang suspect nga si John Mark Geraldez, 19, taga-Barangay Pitalo, mga alas 2:30 sa hapon.
Daling gigukod sa mga barangay tanod si John Mark apan wala na kini maabti ug nadala ang nagkalain-laing mga alahas, laptop ug bag.
Matud ni PO3 Antonio Tabor, imbestigador, nga samtang busy ang pamilya sa haya sa amahan ni Sasam giingong misaka si John Mark sa ikaduhang andana sa balay dayong kuha sa pipila ka jalousie blades sa bintana.
Usa ka Gertrudez Geraldez, 49, inahan sa suspek maoy gidakop sa follow-up operation human na-recover kaniya ang pipila sa mga kinawat nga mga alahas ug P8,350 nga kwarta.
“Murag gibinlan iyang mama og pocket money unya atua ang ubang items ngadto daghan kaayo,†matud ni Tabor.
Si Gertrudez anaa na karon sa karsel sa San Fernando Police Station samtang kasong robbery gipasaka na batok kang John Mark ug sa inahan niini sa Cebu Provincial Prosecutor’s Office. (BANAT NEWS)