Bombero sa Talisay nanghatag brochure

CEBU, Philippines - Sa pagsaulog sa Fire Prevention Month and Bureau of Fire and Penology sa dakbayan sa Talisay miapod-apod og mga brochure sa pagpahimatngon sa mga Talisaynon.

Base sa record sa BFP sa siyudad sa sulod napulo ka tuig 71 porsyento nga hinungdan sa sunog ang kabahin sa kuryente diin dunay mga establisamento ug panimalay ang migamit og mga substandard installation, substandard electrical components o devices, illegal plying connection, short circuit ug overloading.

Base usab sa record sa BFP siyam ka porsyento ang open flames sama sa sunog tungod sa pagpataka og labay sa opus sa sigarilyo, pito ka porsyento ang unattended cooking o gibiyaan ang giluto, lima ka porsyento ang combined heat/bonfire, upat ka porsyento ang flammable liquids, tulo ka porsyento ang LPG ug usa ka porsyento ang fireworks explosions/sparks.

Ang hepe sa BFP sa Talisay nga si Chief Inspector Antonio Ortiz mibutyag nga gikan sa buwan sa Enero hangtud sa Pebrero 20, 2013 dunay upat ka insidente sa sunog sa Talisay diin duha niini ang patay ug lima ang non-index fire sama sa grass fire diin ang sagbot mosiga lang kini tungod sa kainit o ba kaha malabayan og opus sa sigarilyo.

Matud ni Ortiz nga padayon ang ilang pagpahigayon og mga fire drills aron pag-edukar sa mga estudyante ug mga kawani sa mga establisamento diin sukad sa buwan sa Enero hangtud sa Pebrero niining tuiga mikabat na sa 21 ka mga establisamento ang napaubos na nila sa fire drill.

Gawas niini duna usab silay gihimong mga fire safety seminar sa mga lugar aron pag-edukar sa katawhan.

Sa laing bahin, si Ortiz mibutyag kini nga ang BFP Talisay duna lang kini karon tulo ka fire truck usa niini aerial ladder ug usa sa maong truck ang naa karon sa shop gipaayo ug ang bag-ong fire truck nga gihatag gikan sa national nga buhatan wala pa kini maabot.

Matud ni Ortiz nga daku kaayong tabang ang bag-o unyang fire truck. Kagahapon sa buntag ang BFP nagpahigayon kini og motorkada sa kadalanan sa siyudad sa pagpahinumdum sa katawhan nga karong buwana fire prevention month.

Lakip sa kasaulogan sa fire prevention month sa Talisay mao ang poster making contest diin mikabat ngadto sa 19 ka mga contestant ang misalmot nga mga tinun-an sa high school sa pribado ug publikong tunghaan sa Talisay. (BANAT NEWS)