Tulo ka priso sa Toledo City police nakaeskapo

CEBU, Philippines - Tulo ka mga piniriso sa Toledo City Police Station ang nakaeskapo tungatunga sa pagbunok sa ulan pinaagi sa pagputol sa puthaw nga bintana sa kasilyas sa ilang selda niadtong Sabado sa gabii.

Ang mga nakaeskapo  mao sila si Joselito Rabaya, dunay kasong illegal possession of fire arms; Nilo Lumbreno, dunay kasong rape ug Junjun Canumay,  may kasong frustrated murder.

Matud ni SPO4 Carmelito Hornales desk officer sa Toledo City, Police dihang nahinabi sa Banat News subay sa imbestigasyon, gigabas sa tulo ang bintana ug didto nanglusot paggawas.

Dunay siyam ka preso sa maong selda niadtong tungora apan wala manguyog ang unom.

Si SPO1 Gerson Lebumfacil maoy duty desk officer niadtong higayuna kinsa maoy nakadiskubre nga kulang na ang ilang mga preso.

Hangtud kagahapon sa hapon, nagpadayon ang pagpangita sa tulo samtang gi-imbestigar karon ang tanang police on duty nianang gabhiuna nga sila si  PO1 Aldwin Pepito;  PO1 Jeffrey Caburnay; Lebumfacil ug ang ika-upat nga mao untay desk  officer niadtong higayuna nga si SPO4 Gil Lastimosa kinsa wala maka duty niadtong tungura tungod kay naglain ang lawas.

Nasuta nga ang asawa sa suspek nga si Lumbreno maoy gitumbok nga nagdala sa gabas pagbisita niini pipila ka adlaw na ang nakalabay. (BANAT NEWS)