Misalmot sa masiao gipanid-an

CEBU, Philippines - Mga nalambigit sa masiao sa barangay Dumlog, dakbayan sa Talisay higpit nga gipanid-an matud ni Kapitan Charles Basillote ug presidente sa Association of Barangay Captain (ABC).

Giangkon ni Basillote nga naproblema sila karon kabahin sa masiao diin dunay giingong silingan nila ang nag-operate diha sa ilang lugar.

Matud ni Basillote nga higpit nilang gipanid-an kung asa dapita mag-tally ang maong mga operator sa masiao aron ilaha kining masikop sa akto.

Ang maong giingong coordinator sa masiao magbalhin-balhin kini og lugar aron lisud sakpon.

Gibutyag ni Basillote nga sa ilang nadawat nga report nga ang financier sa maong coordinator dili taga Talisay.

Ang nahisgutang coordinator naghupot usab kini og mga usher nga maoy mamaligya og mga numero sa masiao.

Sa laing bahin, kahinumduman nga kaniadto ang Dumlog nakontrobersiyal usab kini kabahin sa tigbakayay diin ang giingong nag-operate niini usa ka kagawad sa barangay.

Apan matud ni Basillote nga nahunong na ang maong kalihukan diha sa ilang lugar tungod kay iyahang gibadlong ang maong kagawad. Hinuon ang barangay motugot nga dunay ipahigayong tigbakay kung dunay pista sa usa ka sitio apan usa lang ka adlaw.

Gawas niini naproblema usab kaniadto ang kapitan kabahin sa hantak apan sa higpit nilang pag-monitor niini nakontrolar nila ang maong problema.

Kahinumduman nga ang kapolisan higpit usab kini migukod sa tanang klase sa sugal ilabi na sa masiao.  (BANAT NEWS)