CEBU, Philippines - Mikabat sa napulo ka balay ang naugdaw samtang usa ka tawo ang naangol sa sunog nga miigo sa sitio Kalubihan, barangay Quiot, dakbayan sa Sugbo kagahapon pasado ala 1:00 sa hapon.
Ang maong sunog nga napawong sulod sa 10 minutos midanyos og mikabat sa P300 mil ug miangol kang Alberto Onipa, hingkod nga molupyo sa maong lugar kinsa nadagma dihang midagan kini sa kahadlok sa kayo.
Si Cebu City Fire Department Chief of Operation Insp. Jose Laurito mibutyag sa Banat News nga unom ka balay ang hingpit nga naabo, samtang ang upat igo lang nakan-an sa kayo.
Dugang pa ni Laurito nga ang kayo nagsugod sa ikaduhang andana sa balay sa usa ka Victor Catubig nga posibling naggumikan sa kuryenti nga mikalit og siga sa atop sa maong balay.
Usa sa nakapalangay sa kabomberohan pagsumpo sa kayo mao ang kagamay sa agianan sa lugar nga nasunogan. (BANAT NEWS)