CEBU, Philippines - Nadakpan kagahapon sa kapolisan sa lungsod sa Sta. Fe, Isla sa Bantayan ang usa ka suspek nga milugos sa iyang ig-agaw didto sa barangay Balidbid, sa maong lungsod.
Ang suspetsado mao si Roland Veliganio, 21, ulitawo ug molupyo sa nahisgutang lugar.
Si PO3 Marino Cajes sa Santa Fe Police Station mibutyag sa Banat News nga ang 22 anyos nga biktima nga ig-agaw ra sa suspek, gikan pa sa gitrabahoan niyang beach resort sa maong lungsod nga naglakaw sa karsada paingon sa ilang balay dihang gipasakay kini sa suspetsado sa iyang motorsiklo.
Apan matud pa ni PO3 Cajes nga pag-abot niini sa mingaw nga dapit kalit lang gipahunong sa suspek ang motorsiklo ug gipugos pagguyod ang biktima ngadto sa ngitngit ug gipanamastamasan ang pagkababaye niini.
Human mapahimusli, walay laing nahimo ang biktima gawas sa pagsumbong sa kapolisan.
Ang kapolisan diha-diha milihok dayon ug gisikop ang suspetsado didto sa pinuy-anan niini.
Ang suspek natanggong na sa karsel human ipasaka ang kasong pagpanglugos batok kaniya. (BANAT NEWS)