Dispatser gisikop sa akto nanawag pasahero

CEBU, Philippines - Nasikop  sa  mga  tanod  ang  usa ka dispatser samtang  diha  kini  sa akto nga  nanawag og pasahero nga mosakay sa PUJ sa dalan A.C.  Cortes Avenue sa barangay Ibabao, dakbayan sa Mandaue sa miaging  gabii .

Si PO3 Narsis Baay sa kapolisan sa Presinto 1 miila sa nadakpan nga mao si Rodel Dagatan, 31, ulitawo, nga taga sitio Malibu sa barangay Subangdaku sa maong dakbayan.

Matud   ni PO3 Baay  nga  nagpatrolya  sa maong higayon  ang  mga tanod  sa  Ibabao-Estancia dihang  nasaksihan  nila  ang  pagpanispatser  sa suspetsado  nga  dugay  na  nga  gidili  sa balaod.

Gitataw ni PO3 Baay nga ang  Anti Dispatching Ordinance hugtanon  nga gipatuman sa kagamhanan sa maong dakbayan sa pagsiguro sa kahapsay sa mga sakyanan nga motadlas sa kadalanan.

Gipatuman ang maong ordinansa aron  masulbad  ang  suliran  bahin  sa pagdagsang  sa dispatser  sa kadalanan.

Si PO3 Baay miingon nga ang mga dispatcher nga sagad mag-atang sa kadalanan maoy makapugos sa  pagpahunong sa PUJ bisan sa  mga  lugar  nga  dili loading  area.

Gumikan  niini  mabara  ang  dagan  sa mga  sakyanan  kay  masabud  man  sa mga  PUJ  nga  mohunong  aron  magpaabot  og  pasahero sa dapit  nga  adunay  dispatser.

Gumikan  sa salaod  nga  nahimo  ni Dagatan  gipaslak  dayon  siya  sa prisohan  aron maleksyon  ang  uban  pang  dispatser  nga  gustong  moyatak  sa balaod.

(BANAT NEWS)