Bisan gi-disqualify, Osmeña mokampanya ni Pe

CEBU, Philippines - Bisan og gi-disqualify na sa Commission on Elections si Konsehal Augustus Pe Jr. sa iyang tinguha nga magpapili pagka konsehal sa south district, padayon siya nga ikampanya ni Kongresista Tomas Osmeña.

Matud ni Osmeña nga daku ang iyang pagtoo nga masabtan sa Comelec En-Banc ang ilang argumento og baliktaron niini ang hukom nga gihimo sa Comelec First Division. Si Pe gihukman sa Comelec First Division nga dili makadagan sa eleksyon karong Mayo 13 tungod kay wala niya matuman ang gilatid sa balaud nga anaa siya magpuyo apan gitalikdan sa hingtungdan nga transferee ang dapit nga iyang gigikanan.

Kun si Pe mibiya pa sa pagka-konsehal usa ka tuig sa wala pa ang eleksyon hayan katugotan siya nga magpapili sa eleksyon unya sa Mayo 13.

Ang baruganan sa Comelec mao nga si Pe angay unta nga mobiya sa iyang pagka-konsehal human siya mibalhin sa pagparehistro sa south district kay ang iyang katungdanan nagrepresentar man sa north district.

Apan lahi ang baruganan ni Osmeña kay matud niya ang distrito nga gidaganan ni Pe lahi na nga distrito ug dili na susama nga mga botante ang mopili kaniya sa eleksyon.

Nabalaka hinoon si Osmeña nga basin ang katawhan dili kaayo makasabot sa isyu. Ang balaud naglatid nga ang termino sa mga local elective government official dili molapas sa tulo ka sunod-sunod nga termino.  (BANAT NEWS)