CEBU, Philippines - Gisusama og usa ka manok ang usa ka mag-uuma human gihapsan og pangtapas og tubo ang iyang liog sa silingang iyang gikabingkil ala-una sa kaadlawon kagahapon diha sa sitio Cogon sa barangay Cogon sa syudad sa Bogo.
Ang biktima giila nga si Cornelio Gomez, 56, samtang ang suspetsado usab nailhan nga si Vicentico Jumao-as Senining, 46.Sa pakighinabi sa Banat News kang PO3 Jim Susvilla sa Bogo Police misaysay nga nakig-inom sa mga barkada ang biktima sa usa ka sari-sari store sa maong lugar dihang nahitabo ang pagulgol sa iyang liog.
Sumala pa nga kalit lang mibutho ang suspek ug sa walay igong hinungdan gibunalan ang biktima og kahoy hinungdan sa pagkahagba niini sa yuta.Matud ni Susvilla nga samtang diha na sa yuta si Gomez gilampas sa suspek ang liog niini gamit ang pantapas sa tubo ug diriyot kining maputol.
Patay dihadiha ang biktima ug wala na madala pa sa tambalanan, human sa hitabo malinawong mitahan sa kapolisan sa lungsod sa San Remegio ang suspek. Sumala pa ni Susvilla dugay nang dili maayo ang tinagdanay sa duha base sa inisyal nilang nakuhang impormasyon. (/EIM) (BANAT NEWS)