2 gipanigbas angol sa ilang bayaw

CEBU, Philippines - Pulos naangol ang duha ka mga magsuon human kini panigbasa sa ilang bayaw  didto sa Sitio Danawan, barangay Poblacion lungsod sa Daanbantayan sa miaging gabii.

Ang mga biktima mao si Vicente Mansanares, 38, ug    ang iyang maguwang nga si Placedo Mansanares, 46, pulos minyo ug pulos nagpuyo gihapon sa maong dapit.

Samtang ang suspek mao ra usab ang bana sa ilang igsoon nga si Juanito Pepito, hingkod nga taga MJ Cuenco Extn., Poblacion Daanbantayan.

Si PO1 Aldwin Pepito sa Daanbantayan Police Station  mibutyag  sa Banat News  nga ang mga biktima ug ang suspek  nagkatagbo sa maong  higayon  ug  samtang  nagkulokabildo, nabanhaw ang ilang personal nga away sa pamilya nga misangpot  sa  ilang  panaglalis.

Dihang miinit  na  ang  lalis  mikuha  sa iyang  sundang   ang suspek  ug  gipanigbas ang  iyang  duha  ka bayaw   nga  pulos    samdan  sa nagkalainlaing  bahin  sa lawas.

Dihang nakita  niya  nga samaron  na ang  duha  ug  nalup-og  na sa yuta,  mikabad  ang suspek  og  dagan  pahilayo  sa maong  lugar

Samtang  ang  mga  biktima  gihatud  dayon  ngadto  sa Daanbantayan District Hospital apan gi-transfer kini sa tambalanan  sa dakbayan sa Sugbo.

Ang  kapolisan padayon pang  nangita sa  suspek  aron  moatubang  kini  sa kaso  nga  isang-at  batok kaniya. (BANAT NEWS)