Mayor ug mga konsehal sa Consolacion gipa-ombudsman
CEBU, Philippines - Upat ka konsehal sa lungsod sa Consolacion ang nikiha sa buhatan sa Ombudsman batok kang Mayor Teresa Alegado ug ilang kaubanan sa konseho lakip na ang ubang opisyal sa lungsod. Kini may kalambigitan sa giingong pagpaguba ni Alegado sa nasugdan na nga bag-ong munisipyo balor og P9 milyones.
Ang nisang-at sa reklamo mao sila si Konsehal Nicole Alectis Villo-Escobido; Vito Rolito Villo, Maria Analee Gungob ug Iluminado Alin.
Kauban ni Alegado nga gikiha mao sila si Bise Mayor Aurelio Rey Damole, Konsehal Beinvenido Ermac, Julius Alegado, Brando Cuizon, Nilo Ferraren, Alfred Francis Ouano, Marilou Casul, Crispin Cañeda, municipal legal officer Christian Bacus, municipal engineer Carlito Maglasang, planning officer Salome Palang, municipal treasurer Rosalina Maglasang, magtiayong Edgar ug Leah Maglasang ug usa ka Isidro Ike Maglasang, nga taga Consolacion.
Ang maong proyekto gipatuman niadtong Hunyo 8, 2009, ug giugmad sa Maricivi Structures and Industrial Services ug kini nahuman niadtong Nobiyembre 30, 2009 ug pormal nga gitugyan ngadto kang kanhi mayor Avelino Gungob ug Engr. Maglasang. Ang mga ningreklamo kauban ni Gungob sa One Cebu Party sa umaabot eleksiyon karong Mayo nga maoy kaatbang ni Alegado sa Liberal Party ug sa kaubanan niyang gikiha.
Si Alegado giingong wala nipadayon sa maong proyekto ni Gungob hinungdan nga ang konseho nananghid sa Commission on Audit nga himoon na lang multi-purpose building ug sports complex ang nasugdang proyekto.
Ang COA sa ilang suwat nga gipetsahan og Abril 28, 2011 nitugot sa hangyo sa konseho sa Consolacion.
Apan matud pa sa mga reklamante nga wa nanumbaling si Alegado ug kaubanang opisyal sa suwat sa COA ug nipadayon kini sa pagpaguba sa proyekto. Usa ka Isidro Ike Maglasang ang giingong nagtukod og istruktura sa lugar nga kinoral na.
Gikwestiyon sa mga reklamante ang pagtugyan ni Alegado sa luna ngadto sa magtiayong Maglasang bisan kung kini gipanag-iya sa gobyerno. Sa gipadalang text ni Alegado sa The Freeman, kini nagkanayon nga ilang gisunod ang rekisitos ug hustong proseso sa maong proyekto.
“The project is above board and no short cuts. (It is) based also on the present needs of the town, the municipal council even asked COA to witness the duration of the bidding of the project,†matud pa sa text sa mayor. (BANAT NEWS)
- Latest
