Kabalayan sa Pulangbato demolison sa probe

CEBU, Philippines - Ang mga sakop sa Cebu City Hall Prevention Restoration Order Beautification Enhancement (Probe) wala na manangtang og propaganda materials sa mga kandidato alang sa eleksyon karong Mayo 13.

Ang acting chief sa Probe nga si Raquel Arce miingon nga duna sila’y laing trabaho nga iyang gihulagway nga mas prayoridad kay sa pagpanangtang sa mga propaganda materials sa mga kandidato.

Matud ni Arce nga dunay lote didto sa Barangay Pulangbato nga gidonar sa dakbayan ug tukoran nila og barangay health center apan gitarukan kini og kabalayan sa mga tawo nga mapahimuslanon.

Si Arce misugilon nga usa ka dakung balay ang ila g’yud nga gub-on samtang ang laing unom igo lang magub-an og kabahin sa estraktura.

Daghan pa nga gipangtukod nga mga estraktura diha sa aseras ug ang uban anaa gayud sa karsada nga ila g’yud nga panggub-on.

Si Rama sayo pa mitahas sa mga sakop sa Probe nga maoy manangtang sa mga propaganda materials sa mga kandidato nga gibutang sa dapit nga wala itugot sa Comelec.

Matud ni Arce nga kun kini maoy ilang tutokan pag-ayo mahimutang nga wala na sila’y laing trabaho gawas lang sa pagpanangtang sa campaign posters sa kandidato. (BANAT NEWS)