CEBU, Philippines - Dul-an sa 200 ka mga minero ug trabahante sa usa ka minahan sa dakbayan sa Danao ang nagpanon kagahapon ngadto sa buhatan sa Department of Labor and Employment (DOLE) aron isang-at ang ilang reklamo sa giingong ilegal nga pagkataktak kanila gikan sa ilang trabaho.
Base sa report sa Balitang Bisdak nga ang maong mga empleyado sa nahisgutang minahan mipasangil nga dili maki-angayon ang pagtaktak nila sa trabaho.
Gipangayo sa nahisgutang mga empleyado gikan sa kompaniya sa minahan ang ilang pila ka buwan nga sweldo, 13th month pay nga wala pa mahatag, conversion sa sick leave ug refund sa withholding tax. Usa sa mga empleyadong nataktak mitug-an sa report sa Balitang Bisdak nga wala na sila pabalika sa trabaho ug gihatagan na lang og notisya nga terminated na sila.
Giingong ang maong kompaniya na-alkanse hinungdan nga nanaktak og mga trabahador.
Ang maong mga kawaning gipangtaktak naguol ug naproblema sa ilang adlaw-adlaw nga gastohan sa mga nag-unang panginahanglanon sa ilang pamilya. (BANAT NEWS)