Gi-salvage gitambog sa pangpang

CEBU, Philippines - Patay na nga nakit-an ang usa ka wala hiiling  lalaki nga gitambog sa pangpang  nga  gituohang  gi-salvage ug gilabay didto sa provincial road sa Sitio Madolinog, Poblacion, lungsod sa Borbon kagahapon sa alas 9:00 sa buntag.

Usa ka empleyado sa munisipyo sa lungsod nga si Merly Cansancio, hingkod, maoy  nakadiskobri sa nagbitay nga patay’ng lawas  sa tawo   samtang naglakaw kini sa karsada paingon na unta  nga mo-duty sa trabaho.

Ang biktima hangtud ning pagbalita wala pa  hiilhi   tungod kay walay tagtungod o kabanay nga ni-claim niini.

Gihulagway lang sa kapolisan nga may 40 anyos kapin ang panuigon  niini, 5’8 ang gitas-on, kasagaran ang pamarog, nagsul-ob og senina nga kolor gray, karsones maong, nagsapatos  og Nike nga kolor itom, nag-brief  og Jacky brand, ug brown  ang  bakus.

Naputos sa mga samad ang  kalawasan niini nga wala pa matino kun  pinusilan, o dinunggaban  ba.

Sa pagsuwat  ning  maong balita  gipahigayon  pa  ang  pag-autopsy  sa lawas  sa biktima.

Si SPO4 Carlos Condino, imbistigador sa Borbon Police Station  mibutyag  sa Banat News  nga  mingaw  ug  layo sa mga panimalay ang lugar nga gilabayan sa patay’ng lawas sa  biktima hinungdan nga walay makahatag og impormasyon kun gipusil ug gidunggab ba ang biktima. Hinuon padayon pang  gisusi sa  kapolisan kun  unsay motibo sa krimen ug taga diin ang biktima sanglit walay nakaila niini. (BANAT NEWS)