Gitaktak nga traffic enforcer sa Talisay gi-reklamo ngadto sa LTO

CEBU, Philippines - Usa ka traffic enforcer ang gitaktak gikan sa serbisyo samtang lain pang pito ang gi-monitor sa City of Talisay-Traffic Operations Development Authority (CT-TODA)  tungod sa giingong pagpangilkil sa mga motorista.

Si Almond Keith Dela Peña,  hepe sa mga traffic enforcers sa Talisay mibutyag nga ang maong enforcer gitaktak niadtong Disyembre sa milabay’ng tuig.

Rekomendado kini sa usa ka konsehal sa siyudad apan nagdumili siya paghingalan sa maong enforcer ug sa konsehal.

Matud ni Dela Peña nga usa sa nabiktima sa maong enforcer ang iyang ig-agaw kinsa nadakpan tungod sa kalapasang “beating the red light.” Giingong wala isyuhi og citation ticket o temporary operator’s permit (TOP) sa maong enforcer ang nahisgutang ig-agaw ni Dela Peña apan gipangayoan kini og pinaskohan.

Matud ni Dela Peña nga dihang gipatawag niya ang maong enforcer miangkon kini sa maong pasangil.

Gawas niini giingong ang maong enforcer bisan og off duty kung dunay alarmahan ang mga polis sa trapiko mokuyog kini ug magpapolis-polis usab.

Nasuta nga bug-at ang gibuhat nga kalapasan sa maong enforcer base sa resulta sa imbestigasyon hinungdan nga gitaktak kini sa serbisyo.

Si Bise Mayor Alan Bucao kinsa chairman sa CT-TODA mibutyag nga bisan wala na sa trabaho ang maong enforcer magpapolis-polis gihapon kini ug manakop og mga motorista bisan og wala na sa serbisyo.

Ilaha na kining gi-report sa Land Transportation Office aron ang LTO na maoy mosang-at og kaso.

Sa laing bahin, si Dela Peña nagkanayon nga ang pito ka mga enforcers nga giingong nalambigit usab og pangilkil ang ilang gipanid-an karon. (BANAT NEWS)