CEBU, Philippines - Mikabat sa usa ka milyon ang danyos nga gibilin sa nahitabong sunog sa sitio Renaisanance sa barangay Bulacao sa dakbayan sa Sugbo sa miaging hapon.
Si Cebu City Fire Department Fire Marshall William Tacaldo mibutyag sa Banat News nga ilang gibana-bana nga mokabat sa usa ka milyon ka pesos ang danyos sa maong sunog.
Sa pinal nilang pag-ihap sa mga nasunog nga panimalay miabot kini ngadto na sa 24 ka panimalay samtang tulo niini ang wala gyud hingpit nga nasunog.
Matud pa ni Tacaldo nga wala pa nila masayri kun unsay hinungdan sa maong sunog tungod usab kay aduna kini daghang mga estorya silang nadawat kabahin sa hitabo.
Samtang ang kapin sa 20 ka pamilyang nasunogan kasamtangan unang gipahimutang sa Bulacao Community Gym sulod sa Bulacao Elementary School. (BANAT NEWS)