Nagdala og armas ug shabu sikop
CEBU, Philippines - Nasakmit sa kapolisan ang usa ka armadong tawo uban sa 20 ka gagmay’ng pakete sa shabu sa checkpoint nga ilang gipahigayon sa Brgy. Gun-ob dakbayan sa Lapulapu sa milabay’ng adlaw.
Ang nasikop mao si Alberto Pagobo, 35, minyo ug residente sa Sitio Humayhumay , Brgy. Gun-ob dakbayan sa Lapulapu.
Matud pa ni P/SInsp. Joson Paralag, hepe sa Station 3 sa Lapulapu City Police Office nga atol sa ilang gipahigayong checkpoint sa maong dapit usa sa iyang polis misita kang Pagobo nga luwan sa iyang motorsiklo gumikan sa nagbagal sa kilid niini.
Sa dihang giisa ni Pagobo ang iyang t-shirt mitumaw ang pul-an sa armas nga kalibre 45 ug sa dihang gipangayoan og mga dukomento wala kini makapresentar.
Sa paghiling sa kapolisan sa iyang bulsa ,nakuha usab niini ang 20 ka gagmay’ng pakete sa gituhoang illegal nga drugas (shabu) hinungdan sa pagkasikop sa suspek.
Matud pa ni SInsp. Paralag nga kasong kalapasan sa COMELEC gun ban ug RA 9165 sa paghupot sa maong illegal nga drugas ang ipasaka batok sa suspetsado kinsa nagtingkagol karon sa prisohan. (/WC) (BANAT NEWS)
- Latest
