PESO nakatabang sa way trabaho

CEBU, Philippines - Nakatabang ang Public Employment Service Office (PESO) sa kagamhanan sa dakbayan sa Mandaue alang niadtong nagpangita og trabaho nga midangop ngadto sa nahisgotang buhatan sa milabay’ng tuig diin mikabat sa 12,000 na   ka  aplikante  sa PESO  nga  natala niini ang nagmalampuson sa pagkaplag  og maayong  trabaho.

Kini ang gibutyag  ni Musoline Suliva, nga maoy pangulo sa maong buhatan nga nahinabi sa mga tigbalita   sa  miaging adlaw.

Matud pa niya nga dili madali ang pagkaplag  og trabaho kun magkinaugalingon lang sa pagpangita  og  trabaho  ang  usa  ka aplikante  ug  wala’y sandigan nga mutabang  pag-agak  kaniya  aron  makasulod og trabaho.

Si Musoline miingon nga  sila  gayud  ang  mangunay  sa  pagtabang  sa aplikante nga  makakita  og  trabaho  kay  kun  ilang  pasagdan  kasagaran  mabasura  ra  ang  application  paper  sa  aplikante.

Gitataw niya nga bisan ang mga kompaniya  sa call center  lakip usab sa ilang giila nga makatabang  kaayo sa ilang aplikante   alang  sa trabaho  nga  gikinahanglan  niini.

Dugang pa niya nga daghan gayud hinuon sa mga aplikante sa call center ang     wala madawat tungod kay masango  sa panahon sa  interview tungod sa kakulang   sa kasinatian sa trabaho ug dili hanas mo-ininglis.

Gitataw ni Suliva nga gawas sa call center daghan usab ang mga aplikante nga nagmalampuson sa pagsulod og trabaho  sa mga pabrika, mga dagkong mall sa Sugbo ug ang pipila kanila atua sa gawas sa nasud. (BANAT NEWS)