Mga kawani sa OSCA imbistigahunon

CEBU, Philippines - Pipila ka kawani sa Office of Senior Citizens Affairs (OSCA) sa dakbayan sa Sugbo mag-atubang og imbistigasyon ngano nga ang dokumento nga gisumiter sa usa ka senior didto sa ilang opisina nahiadto man sa laing senior nga nagpuyo habig na sa Talisay.

Si Delia Navales-Ponce, 60, taga Barangay Basak-San Nicolas mipadala sa iyang reklamo didto ni Konsehal Noel Eleuterio Wenceslao kay nagpatabang nga maaksyonan dayon ang iyang reklamo.

 Nahibulong kaayo si Ponce kay ang iyang mga dukomento sa pag-apply og financial assistance para sa mga senior didto man niya gihatag sa opisina sa OSCA kaniadtong Enero 16, apan gitawgan na lang siya sa usa ka Felipe Sasing nga tua kaniya ang iyang dukomento.

 Si Sasing nga nagpuyo sa balay sa iyang anak nga nahimutang dapit na sa utlanan sa Talisay ug dakbayan sa Sugbo miaplay usab og financial assistance didto sa OSCA.

 Matud ni Ponce nga nahingangha na lang siya dihang gitawgan ni Sasing nga tua kaniya ang iyang mga dokumento apil ang application niya para sa cash assistance.

 Si Ponce miingon nga kun wala pa iuli ni Sasing ang maong mga dukomento nga iyang gisumiter hayan maglaum lang unta siya nga giasikaso na ang iyang papeles apan diay nawagtang na sa mga records.

 Basi sa balaud kadtong mga kawani sa kagamhanan nga dili maayo motipig sa mga mahinungdanong dukomento mahimong masilotan tungod kay nakahimo sila og Infidelity in the Costudy of Documents.

 Ang mga konsehal mihukom nga ang maong isyu itugyan usa ngadto sa Senior Citizens Council aron kahimoan og pasiuna nga imbistigasyon ug mosumiter lang sila og report sa konseho.

 Si OSCA chief Rolando “Dodong” Llaguno wala pa makuhai og pamahayag kabahin niining maong isyu.

 Basi sa record niadtong Disyembre, kapin sa 54,000 ka senior ang gigahinan og tag P7,000 nga cash assistance sa dakbayan apan ang maong gidaghanon gitoohan nga mapun-an pa karong tuiga.

 Sa mao hinoon nga gidaghanon adunay 2,500 kanila nga wala mokobra sa ilang hinabang-salapi hangtud nga na-forfeit na lang ang ila unta nga cash assistance.  (Rene U. Borromeo/WC)

Ginikanan sa bata  nga  nabitik sa kuwentas batok  sa buyag may tulobagon

Ni Romeo Limpangog

Ang kaso nga reckless imprudence resulting to homicide   maoy atubangon sa mga ginikanan sa namatay   nga  napulo ka buwan nga bata kinsa natuok ang liog sa gikuwentas nga panagang sa “buyag” sa miaging  adlaw.

Kini ang gipadayag ni PO1 Cristituto Raboy, imbestigador sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News kagahapon sa follow up nga gihimo. Matud pa niya nga ang maong kaso mahimong atubangon sa mga ginikanan sa namatay nga bata kun adunay mga kabanay nga magtinguha sa pagpasaka og kaso batok kanila. Si PO1 Rabor miingon nga base sa iyang gihimong imbestigasyon iyang nasuta nga adunay pagpasagad sa ginikanan kay gibiyaan man kini nga nag-inusara sa sulod sa ilang  balay sa dalan H.  Abellana sa barangay Subangdaku nga natulog sa  duyan nga ginama sa habol.

Ang inahan nga si Elme Cobardo Colina mibiya sa ilang  balay kay  midalikyat  kini  sa pagkuha sa iyang  6-anyos nga  anak nga nagtungha sa Subangdaku Elementary School.

Ang mga silingan wala usab makamatikod sa nahitabo sa bata ug sa iyang pagtuo nga wala na kini makahilak dihang nabitik ang liog nga nagbitay gikan sa gikatulgan niining duyan.

Gitataw ni PO1 Raboy nga ang amahan sa bata nga si Rodel Colina Sr. wala  sa ilang panimalay atol sa maong hitabo kay didto  kini  sa iyang trabaho. Dugang pa niya nga posible nga milihok ang bata sa gihigdaan niining duyan nga maoy hinungdan nga nahulog ug aksidente kining  nabitik sa gikuwentas nga panagang sa buyag dihang nasabod  sa balighot  sa duyan nga habol ug nagbitay na kini nga naabtan sa inahan. Sumala pa ni PO1 Raboy nga giasoy sa inahan ngadto kaniya nga  namugnaw na ang bata dihang gitangtang niini gikan sa duyan ug dali kining gihatud ngadto sa Mandaue City Hospital apan gideklarar kini  sa mga doktor nga dead on arrival. (BANAT NEWS)