Diamante mihimakak sa pasangil

CEBU, Philippines - Gihimakak ni Tuburan Mayor Democrito "Aljun" Diamante ug  sa mayoriya sa iyang konseho   ang mga pasangil nga giwaldas   niya ang panudlanan sa maong munisipyo.

Sa gipahigayon nga press conference kagahapon sa munisipyo sa Tuburan, ang mayoriya sa konseho nagkanayon nga ang akusasyon ni Konsehal Marie Tabotabo usa lang ka dakung tumo-tumo.

"Pulos butang-butang ang tanan. Bakak ang tanan. Politically-motivated na," matud pa ni Konsehal Eduardo Ondoy.

Si Tabotabo  misang-at sa iyang reklamo ngadto sa Office of the Ombudsman-Visayas nga  namasangil nga adunay mga "serious irregularities"   nga  mahimo sa administrasyon ni Diamante.

Giawhag usab ni Tabotabo nga ipaimbistigar sa Ombudsman   ang gigasto sa munisipyo sa pagkaon sa mga misalmot sa medical mission kaniadtong Pebrero 4-8, 2013 nga nagkantidad og tag P300 kada tawo.

Matud pa ni Konsehal   Andot Potencioso nga dili tinuod nga tag P300 kada tawo ang gasto sa munisipyo   kay  tag P80  lang kada tawo.

Ang munisipyo   migahin og P390,000 para sa medical mission apan P324,000 ra ang nagasto.

Samtang si Konsehal Rosendo Mendoza  nagkanayon  usab  nga  ang 5,500 ka mga residente sa 54 ka barangay maoy  nakapahimu   sa maong medical mission.

 "Ang mayor mismo migasto ug P234,000 gikan sa iyang kaugalingong bulsa," matud pa ni Royeto Talaugon, ang municipal administrator.

Nagkanayon usab ang mga konsehal nga daghang nahimo sa ilang lugar ang ilang mayor sama sa pagtukod og mga school building sa mga bukirang barangay, pagpasemento  sa kadalanan sa bukid ug uban pang serbisyo publiko.

"Dili na mahitabo nga mangawat ko sa panudlanan sa atong goberno. Kay kining  akong pagka mayor, serbisyo publiko ni," matud pa ni Diamante.

Midugang ang mga konsehal  sa pag-ingon nga si Diamante wala magdawatan sa iyang suweldo sukad pa kaniadtong 2010.

Ang sweldo ni Diamante gigamit   sa  pagtukod og mga kapilya sa nagkalain- laing sitio sa  Tuburan.

Si Diamante mismo wala na masayod kun pila na kabuok kapilya ang iyang napatukod.

Gawas sa maong pasangil, buot usab ipa-imbistigar ni Tabotabo ang paggasto sa construction sa  Tuburan Boulevard, ang pagpalit sa bulldozer, scholarship grants, barangay aids ug uban pa.

Matud pa ni Diamante   nga iya ra  nga ibatbat ang tanan niyang tubag kung padad-an na siya og summon gikan sa Ombudsman. (BANAT NEWS)