CEBU, Philippines - Gibana-bana nga mikabat og 10 ka mga panimalay ang naugdaw sa sunog nga miigo sa Gorordo Ave., barangay Kamputhaw, dakbayan sa Sugbo alas 7:30 kagabii.
Gideklarar kini nga general alarm, pinaagi sa Bureau of Fire Protection human kini nila madawat sa alas 7:32 sa kagabhion.
Sumala ni Cebu City Fire Marshall William Tacaldo, na-kontrol sa kabomberohan ang maong sunog human sa 28 minutos.
Nasayran sa Banat News nga may walo ka mga fire trucks ang nagtinabangay pagpawong sa kayo aron sa paglikay nga mokatap pa kini sa daghan pang panimalay nga nagsikitsikit sa maong lugar.
Ang mga balay nga naugdaw kasagaran mga ginama sa gaan nga mga materyales hinungdan nga dali ra kaayo kining gikaon sa kayo.
Matud pa ni Tacaldo, sa pagsuwat ning balita wala pa masuta ang gidaghanon sa pamilya ug ingon man ang mga ngalan sa mga apektado sa maong sunog.
Tungod kay sa mga balay nga naugdaw kasagaran may mga nag-abang nga mga trabahante ug mga estudyante.
Hinuon walay natala nga naangol o kaha nakabsan sa kinabuhi sa maong insidente.