CEBU, Philippines - Patay na nga napalgan sa iyang ginikanan ang 15 anyos nga tinun-an sa high school kinsa naghikog sulod sa iyang kwarto kay naguol nga gikasab-an didto sa Sitio Chekosan, barangay Napo, siyudad sa Carcar sa miaging buntag.
Ang nagpakamatay mao si Jha Entice Andol, 15, nagpuyo sa maong lugar, tinun-an sa 3rd year sa Our Lady of Pilar Academy sa lungsod sa Sibonga.
Si SPO1 Silas Ceballo sa Carcar City Police Station mibutyag sa Banat News nga ang maong tinun-an nakit-an na lang sa iyang inahan nga si Melandra nga nagbitay na sulod sa kwarto nga migamit og habol nga gihikot sa iyang liog ug ang pikas tumoy didto igaid sa sagbayan sa balay
Gisuwayan pa unta nila pagsalbar apan nabugtoan gyud sa kinabuhi.
Dugang nahipos nga impormasyon sa kapolisan nasuta nga ang biktima giingong gikasab-an sa inahan nianang gabii gumikan kay wala kini maglung-ag og panihapon kay magtuon pa siya sa ilang leksiyon.
Gumikan sa maong hinungdan misulod sa kwarto ang dalagita ug wala na mogawas hangtud sa pagka-buntag.
Tungod kay wala man kini mangandam alang sa iyang klase, gipugos sa mga ginikanan og abli sa pultahan ang kwarto niini ug didto nakurat na lang sila dihang maoy nakita nga nagbitay na kini ug patay na. (BANAT NEWS)