Carnapping sa Mandaue misiaw

CEBU, Philippines - Naalarma na ang mga molupyo sa dakbayan sa Mandaue sa padayon nga pagpanghasi sa grupo sa   wala hiilhing mga tawo nga mosakiyo sa gi-parking  nga mga  sakyanan sa daplin sa mga dalan .

Si SPO1 Edmund Bilocora sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan nga nahinabi sa Banat News  miingon nga niadtong miaging adlaw laing biktima na usab ang midangop sa ilang buhatan nga nawagtangan sa iyang  sakyanan.

Dugang pa niya nga ang tag-iya nga si Emeraldo Inocian, 61 anyos sa iyang sugilon mitug-an nga ang iyang Starex nga sakyanan nga nagdala sa plate number JES 162  gi-parking niini 100 metros  ang gilay-on gikan sa iyang  balay  sa dalan M.L.  Quezon sa barangay Maguikay sa  maong dakbayan.

Matud pa niya nga nahingangha na lamang kini dihang nahibaw-an nga nawagtang na kini alas 5 pasado ang takna sa buntag nga nakapatumaw sa pagtuo nga posible nga giguyod kini sa Traffic Enforcement Agency of Mandaue (TEAM) ug gidala sa impounding area. Dihang gitawagan ang buhatan sa TEAM  nasayran niya nga wala kini guyora sa towing truck sa maong dakbayan ug wala usab kini sa ilang impounding area.

Subay sa natala sa buhatan sa Theft and Robbery Section  (TRS) sa MCPO nga ang sakyanan ni Inocian maoy ika 19 ka sakyanan nga gikatahong nawagtang sa lugar nga giparkingan sukad sa bulan sa Enero niining tuiga.  (BANAT NEWS)