Nag-inom sa Mango Square nalubaan kritikal

CEBU, Philippines - Nagpabilin  sa kritikal nga kahimtang ang usa ka lalaki human kini dunggaba sa usa sa  mga  nanag-inom  sa Mango Square, sa dalan Mango  Avenue, dakbayan  sa Sugbo  sa  miaging kaadlawon

Ang biktima nailhan nga si John Kortner Cuico, 26, kinsa  samdan sa iyang lusong-lusong samtang ang gitumbok nga suspetsado nailhan usab nga si Joel Francisco, 30, way  mga  klarong  address.

Matud pa sa kauban sa biktima nga si Julian Dave Longkines, nga nag-inom sila sa may  Mango Square  uban sa ilang   mga higala  dihang kalit lang mitumaw ang kagubot. Unya  mao  na lay  ilang  nasayran  nga  gidunggab  na  ang  biktima.

Wala  nila  masuta  ang  hinungdan apan  ilang  nasayran  nga  ang  suspetsado  nag-inom  usab  sa maong  lugar  sa laing  lamesa.

Samtang ang suspetsado kinsa  nadakpan  usab  dayon  sa kapolisan  mitug-an nga  ang  iyang  gibuhat  usa  lang  ka ‘self-defense” kay  sa maong  higayon  kuno  gialirongan  na  siya sa  mga kauban sa biktima kay buot  siyang  patyon

Ang kapolisan sa homicide section nga gipangulohan ni SPO3 Rey Cuyos mipahigayon  karon og lawom nga imbestigasyon kalabot sa maong insidenti aron masuta  kun si kinsa gayud ang  nag-una  sa kagubot ug diin usab kini  magsugod.

Kasamtangang  nagtingkagol sa karsel sa Police Station 2 ang suspetsado samtang nagpaabot kini sa kasong ipasaka batok kaniya. (BANAT NEWS)