CEBU, Philippines - Kagamhanan sa dakbayan sa Talisay naghuwat nga dunay igahin nga pundo ang Department of Labor and Employment (DOLE) alang sa sweldo sa mga mag-summer job nga mga estudyante.
Hapit na ang pagtak-op sa klase o bakasyon sa mga estudyante ug matag summer vacation dunay mga estudyante nga gustong mag-summer job aron ang ilang makita maoy gamiton nila sa pagpa-enroll ug pagpamalit og mga kinahanglanon sa eskwelahan sa pagbukas na usab sa klase.
Sa milabay’ng upat ka tuig ang mga kabus nga estudyante sa dakbayan sa Talisay nakapahimulos sa summer job sa DOLE ug siyudad.
Si Talisay City Administrator Richel Bacaltos nagkanayon kini nga upat ka tuig nang nagpahigayon og summer job ang Talisay apan lat-ang-lat-ang kini.
Matud niya nga niining tuiga maghuwat pa sila sa DOLE kung mohatag ba kini og pundo alang sa mag-summer job. Ang pundo nga ihatag sa DOLE atbangan usab kini sa Talisay.
Linibo ka mga kabus nga estudyante sa Talisay ang nakapahimulos kaniadto sa summer job. Ang maong mga estudyante bahinon kini sa duha ka grupo ug matag grupo makatrabaho kini sulod sa usa ka buwan.
Ang unang grupo magsugod og trabaho sa buwan sa Abril ug ang ikaduhang grupo adto na makatrabaho sa buwan sa Mayo. Kasagaran nga trabaho sa maong mga mag-summer job mao ang pag-survey sa mga lugar aron mahibaw-an kung unsay mga problema sa mga residente sa Talisay.
Ang matag estudyante nga mag-summer job makadawat kini og P200 nga sweldo matag adlaw.
Si Bacaltos midugang nga naghuwat pa sila sa DOLE nga makig-coordinate sa siyudad alang sa maong proyekto. (BANAT NEWS)