CEBU, Philippines - Kritikal ang kahimtang sa usa ka piggery worker human kini banhigi sa upat ka tawo ug gipusil samtang naglakaw sa karsada pauli sa ila gikan sa trabaho didto sa barangay San Isidro, lungsod sa Asturias sa miaging hapon.
Ang biktima mao si Elizaldy Larbio Lozon, 32, ulitawo, nagpuyo sa maong lugar ug nagtrabaho isip helper sa usa ka piggery farm o baboyan nga nahimutang sa maong lungsod.
Sa upat nga suspetsado , usa pa lang niini ang nadakpan sa kapolisan atol sa hot pursuit operation nga ilang gilusad
Ang anaa na sa kustodiya sa kapolisan mao si Tomas Capangpangan, 36, ug nagpuyo ra usab sa maong dapit.
Samtang ang laing tulo ka mga suspek nga pabilin pang nagtago- tago mao si Wereto Adulfo, hingkod, usa ka alyas Guzon ug Giovani Adulfo kinsa pulos nagpabiling gawasnon.
Si PO3 Joel Mata sa Asturias Police Station mibutyag sa Banat News nga ang biktima nagbaktas sa karsada paingon nang mopauli dihang pag-abot sa maong lugar kalit lang kining gipusil sa mga suspetsado nga miatang kaniya ug naigo kini sa tiyan. Daling gihatud sa tambalanan sa dakbayan sa Sugbo ang biktima ug padayon pang giatiman sa mga doktor.
Ang suspek nga si Capangpangan nagtingkagol na karon sa karsel ug kagahapon gipaubos kini sa paraffin test apan nanghimakak nga may kalambigitan sa krimen.
Personal nga dumot ang gihulagway sa kapolisan nga motibo sa maong pagpamusil apan ila pang paladman ang imbistigasyon sanglit wala pa masikop ang laing tulo ka suspek. (BANAT NEWS)