Multicab sa Barili gipamawi sa Capitol

CEBU, Philippines - Gibati  og kahasol ang  mga Barilinhon  niining  pagbawi  sa  duha  ka multicab  gikan  sa  duha  ka barangay  sa maong  lungsod  nga  giisip nila  nga tataw  nga  pagpanggukod.

Gipasabot  kagahapon ni  Vice Mayor  Marlon  Garcia  sa Banat News  nga ang  gipamawi  ni  acting  Governor  Agnes  Magpale  nga  multicab  mao  ang gigamit  nila ni  Association  of Barangay  Councils  President  Norman  Anore  ug  Kapitan  Nelson  Gingoyon  sa  barangay  Guibuwangan.

Si  Anore  mao  usab  ang kapitan sa barangay  Mantalongon  nga sama sa Guibuwangan,    pulos  mga  dagkong  barangay  sa Barili.

Matud  pa  ni  VM Garcia  nga  natataw  nila  nga   pagpanggukod  ang  gihimo   ni acting  Gobernor  Magpale  tungod  kay  sa kadaghang  multicab  nga  giluwat  kaniadto  ni governor  Gwen  Garcia (igsoon  ni VM  Garcia)  ngadto  sa kalungsoran  ug  kabarangayAN  sa tibuok  lalawigan,  ang  multicab  ra man  nga gigamit  ni  Anore  ug Gingoyon maoy gipamawi.

Gumikan  niini  “naglagot  na pag-ayo  ang  katawhan  sa Barili niining  ilang  gibuhat,”  sumala  pa ni  VM  Garcia.

Laing  pagpanggukod  nga  gitataw  sa  bise  mayor  sa  Barili  mao  ang  pagdakop  sa  watchman, (sa  lugar   diin bawia  sa mga tawo  ni Magpale  ang  tourist  bus)  gumikan  lang  kay  wala  makadala sa iyang  driver’s license. Matud  pa  niya  nga  ang  mipadakop  sa maong  watchman  mao  ang hepe  sa kapolisan  sa Barili  kinsa  sa samang  higayon  maoy  mikuyog  sa  mga  tawo ni  Magpale  sa pagkuha  sa tourist  bus  sa  miaging  semana.

Matud  pa  ni VM  Garcia  nga ang  motorsiklo  sa maong  watchman  kompleto  og  CR  ug  OR apan  ang  kuwang  mao  ra gyud  ang  lisensya  sa driver, “unya  gisakmit  ang  motor”, niya  pa.

Hinuon  gi-release  kagahapon    sa buntag ang  motorsiklo  human  ikapakita  ngadto  sa  hepe  ang  mga  papeles  sa driver.

Midugang  si  VM  Garcia  nga  misamot  na  kalagot  ang  mga  tawo  sa  Barili  batok  sa acting governor  ug  sa  mga  kaalyado niini  sa Barili  nga  nakapasamot  sa  kadaot  sa dungog  sa kasamtangang nagdumala  sa Kapitolyo  tungod  niining  pagpanggukod  nga  ilang  gihimo  karon.

Samtang  bahin  sa ilang  kiha  batok  sa illegal  nga  pagbawi sa tourist  bus  si VM  Garcia  nagkanayon  nga  kasamtangan  na  nga  gihikay  sa ilang  abogado  ang  tanang  papeles  ug  ipasaka  na  nila  sunod  semana  sa korte  ang  maong  kaso .

Samtang  sa bahin  ni  acting  Governor  Magpale,  igo  lang  kining  miingon  nga  gihimo niya  ang  iyang  katungdanan  ug  wala  niya  ikatingala  ang  mga  reaction  nga  sama  niini.

Ang  iya  lang  gipahayag  sa sayo  pa  nga  papanubagon  niya sa    balaod  ang  mihimulbol  sa tourist  bus.  (BANAT NEWS)