Kaso vs Tigbalita gibasura

CEBU, Philippines - Gibasura sa Municipal Trial Court in Cities (MTCC) ang duha ka kasong grave oral defamation batok sa tigbalita nga si Gregg Rubio sa The Freeman ug Banat News.

Si MTCC Branch 3 Judge Wilfredo Dagatan niluwat sa kamandoan nga gipetsahan og Enero 22, 2013 nga nagbasura sa kasong gipasaka sa usa ka Paz Lim batok ni Rubio niadto pang tuig 2011.

Hinoon ang kaso walay kalambigitan sa trabaho ni Rubio kundili sa iyang pagka-pangulo sa San Vicente Ferrer Tabok Homeowners Association, Inc. (SVFTHAI) sa barangay Tabok, dakbayan sa Mandaue.

Si Lim nangangkon nga siya ang tag-iya sa luna nga gipuy-an sa kapin 200 ka pamilya nga gipangulohan ni Rubio kansang grupo nagduda sanglit ang titulo sa yuta nakapangan sa magtiayong Antonio Lim Tanhu ug Dy Ochay.

Ang mga sinaligan ni Paz Lim nga sila si Benjamin Abano ug Dante Tomongha mikiha na og ejectment sa grupo ni Rubio sa barangay apan gitambagan sila sa mga Lupon nga modangop sa korte kung tinuod pa ang ilang pangangkon.

Apan nakurat na lang si Rubio nga siya ra ang gipasakaan og kaso nilang Paz uban sa mga testigos nga sila si Abano ug Tomongha ug walay kasong “ejectment” nga gipasaka hangtud karon.

Si Rubio gipasanginlan ni Paz nga mihingan kaniya og tikasan ug mangingilad.

Nisamot ang pagduda ni Rubio ug kaubanan sa SVFTHAI nga panghadlok lang ang gihimo ni Paz sanglit wa gyud kini mopakita sa korte sa dihang gisugdan na ang husay sa sala ni Dagatan.

Gihatagan ni Dagatan og pila ka higayun si Paz nga motunga sa husay apan wala gyud kini mopakita hinungdan nga giduso sa abogado ni Rubio nga si Atty. Agueda Tiu-Monteclar nga ibasura na lang ang kaso sanglit naglanganlangan lang kini sa iyang kliyenti nga usa ka peryodista. Sa katapusang husay niadtong Enero 22, 2013 gihukman nga ibasura na lang gyud ang maong kaso nga wala usab supaka sa piskal nga nagkupot niini.

Si Rubio nagpasalamat sa mga sakop sa SVFTHAI gumikan sa tabang pinansiyal nga ilang gihatag alang sa gasto sa kaso sama sa piyansa ug bayad sa abogado.  (BANAT NEWS)