7 anyos gilugos sa silingan

CEBU, Philippines - Nabalhug  sa prisohan  ang  usa  ka ulitawo  human  lugosa  niini ang  7 anyos  nga  batang  babaye didto sa barangay Manduyong lungsod sa Badian niadtong Martes sa alas 8:00 sa buntag. Ang  biktima usa  ka  tinun-an sa Grade-2 sa maong lugar  ug ang  suspek  kinsa  giila  lang  nga  Boy  (dili tinuod  nga  ngalan) silingan  ra  sa biktima.

Si PO3 Redeemer Aendan sa Badian Police Station  mibutyag  sa   Banat News  nga  samtang   naglakaw sa dalan  ang  biktima paingon na untang mo-eskuwela nianang buntag, giatangan kini sa suspek. Unya  giingong   pinugsanay  niining  giguyod ang biktima   ngadto  sa kalibonan ug mingaw nga bahin  sa maong  lugar  ug didto gihuboan sa iyang short pants ug underwear ug gipanamastamasan ang biktima.

Ang biktima  kinsa  gibiyaan  lang  sa suspek  pagkahuman,  miadto  sa eskuylahan  ug  misumbong  sa iyang  maestra  sa  nahitabo  kaniya. Human  ikasumbong  sa magtutudlo  sa kapolisan  ang  maong  hitabo milihok  dayon  ang  mga  otoridad  ug  didto  hidakpi  ang  suspek  sa ilang  balay.

Atubangan  sa kapolisan  positibong  gitumbok  sa biktima  ang suspek  nga maoy milugos  kaniya. (BANAT NEWS)