DENR mipalig-on og pundo alang sa kalikopan

CEBU, Philippines - Ang Department of Environment and Natural Resources (DENR-7) uban sa Mines and Geosciences Bureau (MGB-7) bag-ohay lang mipirma og usa ka Memorandum of Agreement (MOA) uban usab sa  Mabuhay Filcement Inc. (MFI) alang sa pagtukod sa Contingent Liability and Rehabilitation Fund (CLRF).

Gipasalig ni MGB-7 Regional Executive Director Loreto Alburo nga ang maong fund mogarantiya sa pagpadayon  sa  kampanya alang  sa pag-atiman   sa kalikopan.

Ang CLRF mitukod  usab  og  Monitoring Trust Fund (MTF) alang  sa pundok  nga  tahasan  sa pag-monitor sa  mga aspeto nga  may  labot  sa pag-atiman  sa palibot.

Gipadayag usab ni Alburo nga ang pagkaumol sa maong fund mahinungdanon kaayo sanglit mao kini mohatag  og mga panukdanan o mekanismo alang sa hingpit  nga  pagpatuman sa  mga  balaod  alang sa  kalikopan.

Ang MFI nga maoy naghupot sa exploration permit nga mitaklap sa 168.3466 ka ektaryang luna sa San Fernando ug syudad sa Carcar nakaluwat  na og tulo ka Compliance Certificates  (ECC) alang sa mineral processing plant niini, clay quarry ug operasyon sa limestone quarry.

Sa bahin usab ni DENR-7 Regional Executive Director Dr. Isabelo Montejo siya mibutyag nga kining maong MOA ika-unom  na  kining partido  sa pagsiguro  nga maatiman  dayon  ang  mga problema nga masagubang sa kalikopan pinaagi sa implementasyon sa tanang aspeto sa proyekto nga  duyogan  usab sa nagkadaiyang magpapatigayon. (/WC) (BANAT NEWS)