Lawas sa apprentice milutaw patay

CEBU, Philippines - Patay na nga nakit-an ang lawas sa apprentice nga marine engineer   nga  milutaw   sa dagat  didto  sa Sandoval Shipyard  sa barangay Tayud,  lungsod sa Consolacion niadtong Biyernes sa alas 6:15 sa gabii.

Ang kapitan sa laing barko nga   gi-dry dock usab sa maong shipyard nga si Capt. Nelio Maratas sa M/V Samar Star maoy nakakita sa paglutaw sa lawas ni  Ariel Montebon, 21, ulitawo, nga taga Ilo-ilo ug apprentice Marine Engineer sa M/V Our Lady of Prosperity.

Si Montebon    gideklarar  nga  missing  niadto pang Huwebes sa alas 7:00 sa gabii.

Kini human  siya  mo-ambak sa dagat gikan sa taas nga bahin   sa gibaradero  nilang barko.

Ang  biktima  miambak   human  matagak ang pitaka sa ilang kusinero nga dunay sulod nga P300  diin   gitipon  usab  niya  pagbutang  ang iyang kwarta.

Matud pa sa mga higala ni Montebon nga sila  si  Brent Magloyuan ug Romeo Conui Jr.  nga nahinabi sa Banat News nga sa diha nga gipahibalo sila ni Maratas  misawom   usab  dayon  sila ug gikuha ang lawas ni Montebon.

“Gikuha namo siya  ug  amo  siyang  gi-rescue. Nagkuha dayon mi  og life proof,  dihang  amo  siyang  nakita  nga  milutaw dapit   sa may star board ,”pasabot pa ni Magloyuan.

Samtang gibutyag usab sa ilang chief engineer nga si Modesto Mayornita  sa Banat News nga sa diha nga ilang gihaw-as ang patay’ng lawas ni Montebon napuno kini sa lapok.

Gani, nagduda sila nga posibling paghunas napiit   siya  sa barko ug posibli usab nga napakong kini nga miresulta na hinoon sa iyang pagkalumos.

Gipadayag usab ni Mayornita nga nakalapas si Montebon sa ilang  balaod  sa barko kay  higpit  man  gyud nila  nga  gidili  unta  ang  pagsawom  kun walay clearance gikan sa ilang labaw.

“Mananghid jud usa ,kaso nalipat man ko kay naa man koy gitrabaho sa ilawom, iya jud tong desisyon”, sumala pa ni Mayornito. Giklaro usab sa mga kaubanan ni Montebon nga wala moambak   ang  biktima kundili mikanaog kini gikan sa barko pinaagi sa air ladder ug misawom sa dagat.

Samtang ang kapolisan sa lungsod sa Consolacion nagpaabot pa usab  og resulta sa gipahigayong awtopsiya sa lawas sa biktima.

Samtang ang mga ginikanan sa biktima didto sa Iloilo napahibawo na sa hitabo  ug gitakdang moabot karong buntag.  (Darrel Carumba , Lesley Caminade-Vestil ug Romeo T. Limpangog/WC) (BANAT NEWS)