CEBU, Philippines - Si Kalihim Proceso Alcala sa Department of Agriculture (DA) mitudlo kang Joel Elumba isip OIC Regional Technical Director (RTD) sa DA 7.
Si Elumba, kinsa lumad nga taga Surigao, mao na karon ang responsabli sa pagpatuman sa mga reglamento sa ahensya ug ingon man sa panukiduki.
Sa iyang mensahe ngadto sa mga kawani sa DA7, si Elumba kinsa sa samang higayon mao usab ang Livestock Coordinator sa ahensya, mipalanog og hangyo nga unta ipadayon sa mga kawani ang ilang kooperasyon sa mga gimbuhaton sa pagpauswag sa sektor sa agrikultura dinhi sa rehiyon. Si Elumba kansang kapikas usa ka chemist nga si Virgita Rosal ug may tulo ka anak, nagbaton og taas nga kasinatian sa pagdumala sa programa sa panghayopan.
Nagsugod siya og serbisyo sa DA7 isip technician sa Artificial Insemination (AI) ug siya ang labing dugay ug karaan nga superintendente sa Ubay south Farm sa Bohol. (BANAT NEWS)