Driver gipusil angol sa tulisan

CEBU, Philippines - Samaran  sa lawas  ang  usa  ka drayber  sa jeep pasaheroan human  kini  pusila  sa wala hiilhing pasahero  nga mitulis  kaniya didto sa    utlanan  sa barangay Dapitan ug  barangay San Miguel sa lungsod sa Cordova  sa miaging kaadlawon.

Ang biktima mao si Edwin Monasque, 34 , minyo nga taga sitio Lucata, barangay Looc, dakbayan sa Lapulapu ug drayber sa multicab nga pasaheroan nga nagbiyahe sa MEPZ sa  Lapulapu.

Si PO2 Jose Garcia sa kapolisan sa maong lungsod nga nahinabi sa Banat News miingon nga ang mga tulisan  nga babaye ug lalaki   mao  na lay  pasahero  nga nahibilin   niadtong  tungora  kay  nanganaog na  ang  uban

Matud  pa ni PO2 Garcia  nga  pag-abot  sa biktima  sa dapit  nga nahitaboan  gitionan  siya  og armas  de fuego sa lalaki  nga pasahero  ug  gimandoan  siya  sa pagpahunong  sa sakyanan  sa maong  dapit  dayon  mideklarar  nga tulis.

Human makuha  niini  ang  pitaka  sa biktima, gidul-itan  pa gyud  pagpusil  ang  iyang  kilid.

Dihang  nakita  sa maong  mga tulisan  nga  mibuhagay  na ang  dugo  sa samad  sa biktima, nagdali kining  nanaog  sa sakyanan  uban  sa babaye  ug  nanglakaw  pahilayo  sa maong  lugar.

Maayo  na lang  kay ang  mga drayber sa ubang  PUJ  nga  nahiagi  sa maong  lugar  maoy  misakwat kaniya  ug  mihatud  sa  biktima  ngadto sa  Lapulapu  City  Hospital  apan  tungod  sa ka delikado  sa maong  samad  dali  kining  gibalhin  ngadto  sa Vicente  Sotto Memorial Hospital.

Si PO2 Garcia miingon nga wala  matino sa biktima  ang kantidad nga salapi nga nasakiyo sa mga tulisan gikan niini.

Samtang  padayon   pa karong  gipangita  sa kapolisan  ang maong  mga tulisan. (/WC)  (BANAT NEWS)