CCMC moderno na’g kahimanan

CEBU, Philippines - Ang Cebu City Medical Center (CCMC) makaangkon na og bag-o ug modernong kahimanan sa pagpanambal ug posible nga punsisokan na kini sa mga pasyente karong tuiga.

Si Dra. Gloria Duterte nga maoy director sa CCMC miingon nga 57 ka bag-ong kahimanan ang ilang napalit nga naglakip sa moderno nga medical equipment nga mo-opera og mga bato sulod sa lawas nga dili na kinahanglang dak-on pa ang samad.

Gipasabot ni Dra. Duterte nga gawas sa 57 ka bag-o ug modernong kahimanan nga napalit na sa CCMC, nagplano usab siya nga mopalit og dugang pa nga kahimanan gikan sa budget karong tuiga.

Ang Cebu City Medical Center gigahinan karong tuiga og P364 milyones nga budget nga mas taas kun itandi sa gigahin sa City Hall sa miaging tuig.

Sa P364 milyones nga gahin sa CCMC, ang P80 milyones niini alang ra g’yud pagpalit og mga tambal ug medisina.

Nagpasabot kini nga maminus-minus na ang sagad mahitabo nga ang mga pasyente hatagan lang sa doctor og mga resita kay nihit man kaniadto ang tambal sa CCMC.

Tungod niini si Dra. Duterte nagtoo nga mag-ambahan ang mga pasyente nga mga kabus nga mohugop sa CCMC aron mopahimulos sa libre nga serbisyo alang niadtong dili makabayad.

Kadtong mga pasyente nga makabayad, pabayron apan sa barato nga kantidad.

 (BANAT NEWS)