CEBU, Philippines - Tulo ka mga lalaki ang nadakpan sa kapolisan human kini hisakpi nga nagluklok og armas de fuego atol sa check point sa kapolisan didto sa sitio Dapdap , barangay Poblacion, dakbayan sa Carcar sa miaging gabii.
Ang unang nasikop mao si Luisito Alquizar,22 , ulitawo nga taga Tubod, barangay Valencia, Carcar kinsa nasakmitan og .38 kalibre nga revolver nga may lima ka buhing bala sa tambor ug ang iyang igsoon sa inahan nga si Nicomedes Romero, 24, minyo nga taga Anonang, Liboron, Carcar.
Si PO1 Japhet Saavedra sa Carcar City Police Station mibutyag sa Banat News nga namatikdan nila nga nahadlok ang duha dihang pagkamatngon nila nga may check point, mikalit kini og balik sa agi nga nagpakita nga may gikahadlokan kini.
Busa dali kining gibabagan sa kapolisan ug dihang na-corner, mihana na og labay sa ilang armas de fuego ang mga suspetsado apan nasakpan kini sa kapolisan busa gisikop dayon. Samtang ang ikatulong nadakpan mao si Jerome Florita, 22, ulitawo apan adunay kapuyo, taga Poblacion-3 Carcar kinsa nasakmitan usab og calibre .45 nga adunay unom ka bala sa magazine.
Miangkon kini nga paingon na unta kini sa bukid apan dihang nakabantay siya sa check point nikalit kini og likay hinungdan nga gigukod kini sa kapolisan ug dihang na-corner na siya misulod sa menteryohan ug didto siya maposasi.
Ang mga nadakpang suspek gitanggong na karon sa karsel ug gihikay dayon ang tukmang kaso nga ipasaka nga may labot sa Comelec gun ban og illegal possession of firearms. (BANAT NEWS)