Dodong Gullas mopakasal sa 38 ka magtiayon

CEBU, Philippines - Mokabat  sa 38 ka magtiayon  ang benepisyaryo sa usa ka mass wedding nga  pasiugdahan ni Jose “Dodong” R. Gullas ug  sa kapikas  niini  nga  si Nena Gullas karong  Biyernes, Pebrero 1, sa  alas 3:00  sa hapon sa St. Therese Parish Church  sa Lahug.

Si Gullas miingon  nga  nadasig  siya  sa pagpasiugda  sa maong  mass wedding   human  niya hisayri  ang kadaghan  diay  sa mga  Katoliko  sa Pilipinas   nga nagpuyo  nga  mansibado  gumikan  sa kaapiki  sa kuwarta  nga  igasto  sa pagpakasal.  Matud  pa  niya nga  ang  maong kalihokan  iya  usab  nga  iatol  sa kasaulogan  sa  iyang  adlaw’ng  natawhan, nga isipon niya  nga  labing dako  nga selebrasyon  sa iyang  kaugalingon karong Pebrero 1.

“Makausa  ra kita molabay  ning  kinabuhia dinhi  sa kalibotan. Sa mga nahibiling mga gutlo  sa akong  kinabuhi, gusto nako  nga makahatag    og handumanan  nga ikaayo  sa akong  mga  kabos nga  mga  igsoong lalaki  ug babaye. Sa katapusan  sa adlaw  ang  labing  makahatag  kanako  og  kalipay mao  ang  hunahuna  nga  kining  takus  ug angayan  nga  mga magtiayon makadawat  na  og  bendisyon  sa Ginoo”, matud  pa ni Gullas.

Si Gullas miingon  nga ang  tanang bayranan sa  goberno  ug  sa simbahan iyang  giabaga  alang  sa maong  mga magtiayon.

Ang  nag-unang  Cebuano make-up artist nga si Jonas Borces sa  Make Up Artists Club of Cebu , maoy  mopahaum  sa  buhok  ug  make-up, samtang  ang  boda sa pangasaw-onon ug igsusul-ob  sa pamanhonon ihatag sa  mga  higala  ni Gullas.

Usa ka  salo-salo    nga dumalahon  ni   Jude Bacalso, himoon  human sa kasal didto  sa  Gullas Medical Center sa Banilad, Mandaue City.

Sa sayo pa mikapin  sa 200 ka parisang magtiayon  ang  buot  untang  mosalmot  sa maong  mass wedding nga gitanyag  ni  Gullas. 

Apan  mikabat  na lang  sa 38  ang  nakapasar  ug nahimong  kalipikado niini  human  sa tulo  ka hugna nga screening  ug  mga  interview, pagpangayo  sa mga  requirement o panginahanglan ug  mga pre-wedding  seminar.

Matud  pa ni Gullas nga kutob  sa iyang  masarangan  mopasiugda  siya  og mass wedding matag  tuig. Gani iyang gitakda  nga mopakasal  siya  og  80 ka magtiayon  sa mass wedding  gihapon  sa sunod tuig.

Sa Sabado Pebrero 2, si Gullas ug  ang asawa niini  nga si Nena mopasiugda usab  og Confirmation rites  didto  sa  Cebu Metropolitan Cathedral alang  sa 25 ka  mga estudyante  sa elementarya, 40  ka estudyante  sa high  school ug 8 ka  mga  faculty members  gikan  sa  University of the Visayas. (BANAT NEWS)