Babaye giluba sa silingan kritikal

CEBU, Philippines - Kritikal ang kahimtang sa usa ka babaye nga gidunggab sa iyang silingang lalaki sa sitio Marbeach sa barangay Marigondon, dakbayan sa Mandaue   sa miaging buntag.

Ang biktima mao si Felicitas  delos Santos Flora, 33,  minyo ug ang suspetsado  mao si Francisco Aton Jr., 25 , minyo, ug pulos nagpuyo sa maong dapit.

Si PO2 John Carlo  Jocotan sa homicide section sa kapolisan sa maong dakbayan nga nahinabi sa Banat News miingon nga nanglaba  ang biktima sa luyo sa ilang  balay dihang kalit lang mitumaw ang suspetsado.

Matud pa niya nga nangita kini sa iyang anak nga babaye apan dihang wala makita sa suspetsado, mihiwasa  kini  sa kasuko  ug  gituok  ang  liog  sa biktima.

Dugang  pa ni PO2 Jocotan   nga  samtang  mikisikisi  ang  biktima sa  kasakit  sa iyang  liog,  gihansakan  kini  sa suspetsado  sa iyang  kutsilyo  ug  gitusak  ang  nagkalainlaing  bahin  sa lawas  sa biktima. 

Dihang  nahagba  na  sa  yuta   ang  biktima kansang  lawas  nabulit  sa dugo  milayas  dayon  ang  suspetsado pahilayo sa maong dapit.

Ang  bana  sa biktima  kinsa  ulahi  na  nga  nakamatikod  sa nahitabo  sa iyang  asawa, maoy  misakwat  niini gikan  nga nagbuy-od  sa yuta  nga  naglunang  sa kaugalingon  niyang  dugo  ug  gihatud  ngadto  sa Mactan Doctor’s Hospital .

Padayon  pang  gipangita  sa kapolisan  ang  suspetsado  samtang ipadayon  pa  usab  nila  ang  imbistigasyon  pagsuta   sa hinungdan  sa maong  pagpanunggab. (BANAT NEWS)