‘Epal’ nga politiko gi-warningan

CEBU, Philippines - Hugot ang pasidaan sa Commission on Elections (Comelec) batok sa mga gitawag nga ‘epal’o badlungon  nga kandidato  alang sa 2013 midterm elections ilabi na sa nagsingabot nga campaign period alang sa national level.

Matud pa ni Cebu Provincial election  supervisor Lionel Castillano nga ilang sundon ang  mando  ni Commissioner Christian Robert Lim, kalabot  sa plano  niining  mopahigayon  og "test case" batok sa mga epal nga politiko aron masuta  nila nga seryoso ang Comelec batok sa mga badlongon nga kandidato.

Ubos sa Comelec Resolution No. 9615, gitugotan  hangtud sa Pebrero 11, 2013 ang mga kandidato ma-incumbent official man  o  dili, nga tangtangon ang ilang mga hulagway o ngalan sa mga tarpaulin nga gibitay  o gipapilit  sa mga estraktura nga  iya  sa goberno.

Samtang gidili usab ang pagtaud  og  mga poster sa gawas sa mga gitakdang mga common poster area sama sa mga eskwelahan, barangay hall, health center, waiting shed, highway, sakyanan nga gipanag-iya sa goberno ug uban pa sa pagsugod sa kampanya.

Nanawagan usab si Comelec Chairman Sixto Brillantes sa publiko nga motabang sa pag-monitor aron masiguro nga mosunod ang mga kandidato sa gitakdang campaign rules. (BANAT NEWS)